الجوع كافر
عن جد الجوع كافر …
مبارح الضهريات انا وراجع على البيت وقت الغدا ..انتبهت على بنت جيرانا ..
صبية حلوة حلوة الله يستر عليها ..حاملة بإيدها صحن مطبق بيتنجان وحطيتو على باب حديقة بيتهن ..
وإذ بقطة صغيرة نطت على هالصحن هديك النطة …ونزلت بهالصحن وقعدت تاكل ..!!
بيتنجان وبندورة وزيت وبصل وبهار …هي هيي مكونات المطبق …القطة شو اللي عجبها بهالمكونات ؟؟؟؟
على أساس انو القطط حيوانات لاحمة..
سلمت على جارتنا وسألتها … معقول متطعوها للقطة مطبق بيتنجان؟؟؟ لتكونو متحطو فيه لحمة؟؟؟
قالتلي لا ما في لحمة والقطة بتاكل شو ما بتحطلها!!!
لاء وقالتلي كمان انو من يومين طعميتها برغل بحمَص!!!
الله يلعن الجوع شو كافر … صارت القطط حيوانات نباتية من ورا الجوع والفقر …
معناها ما لازم نستغرب اذا بعد مية سنة صارت العالم تاكل بعضها …
الجوع كافر ..
دمتم بخير
سلامات أخي علوش…
۩ ● mekdadعجبتني اللقطة(مو القطة) كتير .. و طريقتك بالوصف أكتر ..
الجوع كافر عنجد … و القناعة و الرضا من الإيمان ..
معناتا الواحد مو لازم يتكبر على شي … ما حدا بيعرف شو مخبالو القدر …
لازم يتعود برضاه على كل شيئ أحسن ما يجي يوم يتعوّد فيه على كتير شغلات بالقوة …. أو بالصرماية إذا جاز التعبير
تقبل مروري أخي علي
دمت بالصحة و السعادة و راحة البال
المقداد/ابوحيدر
هلا خيي المقداد /ابو حيدر …
شرفت المدونة …
والقناعة كنز لا يفنى صحيح ..بس يا ترى ممكن كل الناس بيوم من الايام تتأقلم على شي بعمرو ما خطر على بالها ..
يعني الواحد منا إذا ما قعد كل يوم تلات اربع ساعات عالتلفزيون بيحس انو في شي ناقصو…
ممكن يتخيل الانسان حياتو بيوم من الايام بلا تلفزيون ؟؟؟
يا أخي كل شي بيصير ..
شكرا لمرورك العطر خيي ..نورت وشرفت ..
دمت بخير اخي ابو حيدر ..
۩ ● 3alloushخيي علوش كيفك
۩ ● aloshعااااااااادي لا تستغرب
بكرى بعد شي مية سنه بيصير
النمر يفطر زعتر
……
سيدي بهالأيام
عيش شوي ها ( مو كتيرررر) بتشوف بلاوي
بس شو بدنا من الحكي بربي الجوع كافرررر
هلا علوش …
عجبتني شغلة النمر والزعتر …
شكرا لمرورك خيي علوش ..
۩ ● 3alloushشرفت
خي ما تستغرب بهالزمان شي كل شيء اتغير
حتى البشر عم يتفير ويتأقلم مع الوضع الجديد
مشكور أخي الكريم والله يعطيك العافيه .
۩ ● mohanadالجوع كافر بس الذل ملحد , والله يجيرنا من الأعظم .
دمت بخير علوش
۩ ● يعربههههههه حلوة…
كانت تاكل فول وهريسة ومسبحة…… عن جد كانت قطة قنوعة وعلى قولة المتل (الها تم ياكل مالها تم يحكي “بس بتنوي” هههه)
۩ ● sunsetذكرتني بقطة كانت عندي وقت كنت صغيرة (يعني قبل شي مليون سنة)
بس نحن هيك عم نحكي عن القطط (الغلبانة) على قولة المصريين. وما عم نحكي عن الطبقة (الهاي من القطط) لأنو اذا بتفوت على (الشام سيتي سنتر) بتلاقي اكل القطط (الهاي) أغلى من أكلي وأكلك…
مشان هيك بتضل القصة قصة طبقات … يا عمي مراكز ومستويات … شو بدك بالحكي